Либерално-демократската партија бара итно разрешување на директорот на Агенцијата за остварување на правата на заедниците, Далибор Китановиќ, како и постапување на МВР и Јавното обвинителство поради неговата објава поврзана со Ратко Младиќ.
Од ЛДП остро реагираат и на ставот на Владата дека Китановиќ треба да ја повлече објавата или да се повлече од функцијата доколку не се согласува со официјалниот став дека Младиќ е осуден за геноцид и воени злосторства.
Партијата оценува дека не е доволно Китановиќ само да го повлече ставот и се повикува на член 407-а од Кривичниот законик, за кој велат дека предвидува затворска казна до пет години за величење, одобрување или минимизирање геноцид и воени злосторства.
„Државната функција не смее и не може да биде штит од кривична одговорност. ЛДП бара итно разрешување на Китановиќ, а МВР и Јавното обвинителство веднаш да постапат по службена должност согласно членот 407-а од Кривичниот законик“, соопштија од партијата.
Од ЛДП ја обвинуваат Владата за двојни аршини, тврдејќи дека законите строго се применуваат кон граѓаните, додека за носителите на јавни функции, според нив, се остава простор за политички изговори и повлекување на веќе изнесени ставови.
Китановиќ пред два дена на Инстаграм објави фотомонтажа на која Ратко Младиќ е прикажан со повеќе личности од српската историја, меѓу кои и Дража Михајловиќ, со порака „Генерали на небеската војска“. Објавата предизвика реакции од повеќе политички партии и организации.
Владата претходно соопшти дека ставот на Китановиќ е личен и неприфатлив и дека доколку не се согласува со официјалната позиција за Ратко Младиќ, се очекува да се повлече од функцијата.