Владата се огради од ставовите на директорот на Агенцијата за остварување на правата на заедниците, Далибор Китановиќ, поврзани со Ратко Младиќ и порача дека доколку тој не го прифаќа официјалниот став на Владата, се очекува да се повлече од функцијата.
Од Владата нагласуваат дека нивната позиција е јасна и се темели на правосилните пресуди на меѓународните судови – дека Ратко Младиќ е осуден за геноцид, злосторства против човештвото и воени злосторства.
„Ставот на директорот Китановиќ е негов личен став и е неприфатлив за Владата“, велат од „Илинденска“.
Оттаму додаваат дека секој носител на јавна функција кој е дел од извршната власт треба да ги почитува официјалните позиции на Владата.
„Доколку некој не се согласува со ставот на Владата дека Ратко Младиќ е правосилно осуден за геноцид, злосторства против човештвото и воени злосторства, тогаш се очекува да се повлече од функцијата“, наведуваат од Владата.
Реакцијата следува по објавата на Китановиќ во која Младиќ беше прикажан во позитивен контекст, што предизвика реакции од повеќе политички партии и барања за негова политичка одговорност.
Од Владата очекуваат Китановиќ да го повлече својот став, а доколку тоа не го направи, останува отворено прашањето за неговото понатамошно останување на функцијата.