Либерално-демократската партија побара Владата јавно и недвосмислено да се огради од, како што велат, величењето на Ратко Младиќ, кој беше правосилно осуден на доживотен затвор за геноцид во Сребреница, злосторства против човештвото и воени злосторства.
Од ЛДП велат дека ваквите постапки не можат да се оправдаат како политички став или различно толкување на историјата, особено кога се поврзани со носители на високи државни функции.
Партијата бара Владата да утврди политичка одговорност за постапувањето на министерот за локална самоуправа и директорот на Агенцијата за остварување на правата на заедниците.
„Не може Македонија пред Брисел да се повикува на европски вредности, а дома Владата да молчи кога нејзини функционери учествуваат во величење на лице осудено за геноцид“, велат од ЛДП.
Оттаму бараат случајот да не заврши само со политичка одговорност, туку Министерството за внатрешни работи и Јавното обвинителство да испитаат дали со објавите и изјавите е сторено и кривично дело.
ЛДП се повикува на член 407-а од Кривичниот законик, кој го санкционира јавното негирање, грубо минимизирање, одобрување или оправдување на геноцид, злосторства против човештвото и воени злосторства преку информациски систем.
„Државната функција не смее да биде штит од законот“, порачуваат од партијата, барајќи институциите по службена должност да ги испитаат сите објави и постапки поврзани со случајот.
Од ЛДП предлагаат и пошироки законски измени со кои јасно би се забранило јавното величење и промовирање на лица правосилно осудени за геноцид, злосторства против човештвото и воени злосторства, како и промоцијата на фашистички, нацистички и други тоталитарни идеологии.
Според партијата, ваквите ограничувања треба да важат и при именување здруженија, фондации, клубови, јавни установи, улици, плоштади и други јавни обележја.
ЛДП бара и образовниот систем да има поактивна улога во спречувањето на историскиот ревизионизам, со изучување на геноцидите и воените злосторства врз основа на историски факти и правосилни судски пресуди.
„Почитувањето на жртвите и осудата на геноцидот се црвена линија. Нема молк кога се величаат осудени за геноцид и нема државна функција над законот“, порачуваат од ЛДП.