Меѓународното здружение за транспортен бизнис соопшти дека по месеци апели за решение на проблемот со ограничениот престој на професионалните возачи во Шенген зоната, возачите од Западен Балкан и понатаму се соочуваат со апсења, депортации и забрани за влез.
Тие упатија повик до сите транспортери и вработени во компании кои вршат меѓународен товарен и патнички превоз, на мирен протест во понеделник, 31 август, од 12:00 до 14:00 часот, по што е најавена и блокада на граничните премини.
„Само во последната недела, според евиденцијата на Здружението, повеќе од 50 српски возачи се вратени од шенгенските граници. Иако нацрт-стратегијата на ЕУ за визи и брифинзите што следеа јасно ставија до знаење дека професионалните возачи на патен товар се препознаваат како посебна категорија лица на кои им е потребен подолг период на престој од сегашните 90 дена во 180 дена, очигледно е дека во Европската комисија и меѓу земјите-членки не постои волја и желба да се реши овој проблем“, беше објавено на веб-страницата на здружението.
Од Здружението посочуваат дека од јануарските протести досега не е понудено ефикасно решение. Поради тоа, тие најавуваат дека протестот ќе започне на 14 септември 2026 година на сите гранични премини кон ЕУ, заедно со колегите од Босна и Херцеговина, Црна Гора и Северна Македонија.
„Како последен повик за разум упатен до Европската комисија и земјите-членки на Шенген зоната, пред седиштето на Делегацијата на ЕУ во сите четири земји – Босна и Херцеговина, Црна Гора, Северна Македонија и Србија ќе се одржи мирен јавен собир, а транспортерите и возачите ќе упатат ист официјален повик во кој апелираат за последен пат да не им се дозволи на транспортерите и возачите да бараат решение на протестите на границите“, се нагласува во соопштението.
Транспортерите од регионот претходно ѝ поставија рок на Европската Унија до 1 септември за изнаоѓање конкретно решение. Претседателот на Српското здружение за меѓународен транспорт, Неѓо Мандиќ, изјави дека блокадата не е цел сама по себе, туку средство за притисок доколку не се започнат сериозни преговори.