Агенцијата за храна и ветеринарство (АХВ) ги засили теренските активности за утврдување на епидемиолошката состојба со болеста Западнонилска треска кај живината. Активниот надзор се спроведува на целата територија на државата преку лабораториско тестирање на мостри земени од живина во селски стопанства, птици чувани во затворен простор и одгледувалишта на водени птици.
Со надзорот се опфатени домашни птици од видовите кокошки, мисирки, фазани, еребици и ноеви, како и диви птици меѓу кои гуски, пајки, лебеди, штркови, соколи и други. Пасивниот надзор за птичји грип, кој се спроведува со пријавување на сомнеж и угинати птици, во моментов е проширен и се однесува и на Западнонилската треска.
Од АХВ информираат дека корисниците на дивечот во ловиштата, зоолошките градини и националните паркови се должни да ја пријават секоја угината дива птица до ветеринарните служби. Истата обврска за пријавување на отстрелот ја имаат и ловните друштва за време на ловната сезона.
Забележани се и првите позитивни случаи кај дивите птици по обработката на пристигнатите пријави од терен.
„Во период од 24.08.2026 до 27.08.2026 пристигнати се повеќе од 100 пријави од граѓани, дел од пријавите се однесуваат на угинати птици, како што се врапчиња и други видови, кои не се соодветни за испитување за Западно нилска треска. Поради тоа, не секоја пријава може да резултира со земање примерок и лабораториско испитување. Од тестираните примероци, досега се добиени два позитивни лабораториски резултати – еден кај угината птица пронајдена на подрачјето на Скопје и еден кај птица пронајдена на подрачјето на Ресен“, соопштуваат од АХВ.
Од Агенцијата апелираат до одгледувачите на живина да ги почитуваат мерките за биосигурност и да го ограничат контактот со диви птици. Граѓаните се советуваат да не создаваат паника при појава на поединечна угината птица, туку да известат доколку забележат поголем број угинати преселни птици на исто подрачје.
Собирањето на угинатите птици во Скопје се врши во соработка со Град Скопје, додека во другите општини оваа активност ја спроведуваат официјалните ветеринари во соработка со локалните комунални претпријатија. По подигнувањето на соодветните примероци се врши нивно нештетно отстранување и дезинфекција на теренот.