Власта на Мицкоски и ВМРО-ДПМНЕ зад грбот на граѓаните турка проекти за дата-центри кои можат директно да ги загрозат водата, струјата и македонското земјоделство, изјави Маја Борозан на денешната прес-конференција на СДСМ.
Според неа, по Пехчево, една компанија веќе соопштила дека од Владата добила капацитет за струја од 100 мегавати и директен пристап до реката Вардар за ладење.
„За ова владата нема ништо нема соопштено. Се прават дилови за профити додека се крие од јавноста какви обврски се преземаат и како овие проекти ќе влијаат врз природните, енергетските ресурси во државата и земјоделието“, изјави Борозан.
Од СДСМ истакнуваат дека дата-центри трошат огромен капацитет на струја, што може да доведе до зголемен увоз од странство и дополнителни трошоци за граѓаните.
„Што ќе значи ваквата потрошувачка за цената на струјата за граѓаните? Колку ќе ги чини? Кој гарантира дека граѓаните нема да плаќаат повисока цена за струјата за некој друг да прави огромни профити?“, прашуваат од опозициската партија.
Покрај енергетскиот сектор, од партијата предупредуваат и на последиците врз земјоделството поради пренасочувањето на водните ресурси за ладење на овие капацитети.
„Кој гарантира дека земјоделците нема да останат без вода за наводнување заради дата-центрите? Земјоделскиот сектор и земјоделците се целосно запоставени, сега им следи нов удар поради тоа што водата ќе биде пренасочена за ладење на дата-центри?“, истакна Борозан.
На крајот од прес-конференцијата беше порачано дека целиот процес се одвива без транспарентна постапка, со цел остварување профит на штета на граѓаните.