Цената на нафтата продолжува да паѓа на светските пазари, поттикната од надежите дека напредокот во разговорите меѓу Иран и Оман може да доведе до постепено повторно отворање на Ормускиот Теснец и нормализирање на поморскиот сообраќај.
На лондонскиот пазар барел брент околу пладне се тргуваше по 86,70 долари, што е пад од 1,88 долари во однос на претходното затворање. Американската WTI нафта поевтини за 1,61 долар и се спушти на 80,75 долари за барел.
Во фокусот на пазарите се разговорите меѓу Иран и Оман за договор што би овозможил транспорт на нафта и други петрохемиски производи низ Ормускиот Теснец. Напредокот во преговорите ги зголеми очекувањата дека танкерскиот сообраќај би можел постепено да се врати кон нормала.
Според иранската агенција „Тасним“, двете земји постигнале договор за уделите и приходите поврзани со теснецот, но иранската Револуционерна гарда во меѓувреме ги обвини САД дека ги попречуваат разговорите, поради што тие биле одложени.
Сообраќајот низ Ормускиот Теснец и натаму е значително намален. Во вторникот низ него поминале само пет бродови што превезуваат суровини, додека десетдневниот просек е околу 15 бродови дневно.
Пазарите внимателно ги следат и обидите за пошироко смирување на тензиите во регионот. Пакистан и Иран соопштија дека е постигнат „значителен напредок“ во разговорите насочени кон прекин на конфликтот и воспоставување мир.
Во исто време, Вашингтон ги прошири санкциите кон иранската економија и предупреди дека со мерки може да се соочат и земји кои ќе продолжат да соработуваат со Техеран.
Пад бележи и референтната кошница на ОПЕК. Според податоците на организацијата, цената на барелот од кошницата на земјите членки во вторникот се намалила за 4,44 долари и изнесувала 90,28 долари.
Ормускиот Теснец е една од најважните светски рути за транспорт на нафта, па секоја најава за негово отворање или затворање има директно влијание врз цените на енергенсите на глобалните пазари.