Мета постигна спогодба во голем судски спор во САД, со која компанијата ќе плати најмалку 12,1 милијарда долари, а сумата може да достигне 17,1 милијарди долари. Истовремено, Инстаграм и Фејсбук ќе добијат серија ограничувања за малолетните корисници.
Тужбата ја поднесоа јавните обвинители на 29 американски сојузни држави, кои ја обвинуваа компанијата дека преку дизајнот и функционирањето на своите платформи свесно ја загрозувала благосостојбата и менталното здравје на младите.
Со спогодбата Мета не признава вина, но се обврзува во следните години значително да го промени начинот на кој малолетниците ги користат Инстаграм и Фејсбук.
Една од најголемите промени е ограничувањето на времето поминато на двете платформи. Тинејџерите ќе можат да ги користат Инстаграм и Фејсбук вкупно најмногу два часа дневно, а на секои 15 минути ќе има прекини со кои треба да се намали непрекинатото скролање.
Овој режим треба да важи пет години. Доколку Снепчет, Тикток и Јутјуб воведат слични мерки, ограничувањето би можело дополнително да се намали на 60 минути дневно.
За малолетниците ќе има и ноќна забрана. Пристапот до Инстаграм и Фејсбук ќе биде блокиран од полноќ до 6 часот наутро, додека известувањата ќе бидат исклучени од 22 часот навечер до 7 часот наутро.
Дополнително, за време на учебната година платформите нема да смеат да испраќаат известувања до малолетните корисници од 8 до 15 часот.
Меѓу промените е и оневозможување на малолетните корисници да го гледаат бројот на лајкови и реакции на објавите, како и воведување нови алатки преку кои родителите ќе можат подобро да го контролираат користењето на платформите од страна на нивните деца.
Финансискиот дел од спогодбата предвидува Мета да исплати најмалку 12,1 милијарда долари во период од десет години. Износот може да биде зголемен за уште пет милијарди долари, зависно од исходот на постапките и договорите со други големи компании од индустријата на социјалните мрежи.
Правните експерти ја оценуваат спогодбата како една од најзначајните досега против голема технолошка компанија и како важен преседан во обидите за поголема заштита на децата на интернет.