Советникот во Општина Гази Баба, Александар Вељановски, алармира за потенцијална финансиска штета врз буџетот на Општината и Градот Скопје во износ од 23,5 милиони евра преку нов Детален урбанистички план кај „Ист Гејт“.
Според Нацрт-ДУП-от ЦС09 Блок, на површина од околу 141.000 метри квадратни се предвидува изградба на објекти со намена Б5 (хотелски комплекси) со околу 3.500 соби.
Вељановски изрази сомнеж дека на овој начин се овозможува изигравање на законот, бидејќи наместо за станови, комуналиите за хотели се плаќаат со попуст.
„Ако се градат станови, за оваа површина во буџетот би требало да се слеат околу 25 милиони евра. Но, бидејќи инвеститорот добива маркица за „хотел“ намена Б5, тој законски плаќа само 5% од овој износ. Тоа значи дека наместо 25 милиони, ќе се платат само нешто над 1.2 милиони евра“, изјави тој.
Советникот упати директни прашања до градоначалникот Боби Стефковски и градските власти:
„Дали со овој ДУП директно му се овозможува на инвеститорот да заштеди 23.500.000 евра, пари кои треба да завршат во буџетот на Гази Баба и Град Скопје, а објектите потоа повторно да ги продава како апартмани за живеење? Дали со ваквиот план му се прави дополнителна услуга на инвеститорот да заштеди пари преку изградба на помал број паркинг места, согласно стандардите за хотели кои бараат помалку паркинзи отколку оние за станбени згради?“
Покрај губењето на општинските пари, тој предупреди и на административните пречки со кои би се соочиле купувачите при пријавување на живеалиште.
„Дали идните купувачи свесно ќе бидат доведени во правна замка? Дали тие луѓе ќе можат воопшто да извадат лична карта во МВР на таа адреса, со оглед на тоа што објектот ќе се води како хотел? Ова не го зборуваме на памет. Дали ќе се повтори истиот случај како со веќе изградениот објект на соседната градежна парцела каде луѓето веќе се вселени и живеат во станови, но не можат да ги пријават како свое место на живеење во МВР?“, изјави Вељановски.
На крајот, тој истакна дека се работи за пари од граѓаните наменети за инфраструктура и побара одговорност од надлежните институции.