Опозицискиот СДСМ бара итно намалување на ДДВ-то за горивата од 18% на 5% и намалување на акцизите за 50%, по најновото поскапување на дизелот кој го надмина износот од 100 денари за литар.
На денешната прес-конференција, Наташа Поповиќ, членка на Извршниот одбор на СДСМ, истакна дека ова е нов удар врз стандардот на граѓаните, обвинувајќи ја Владата дека не презема мерки за заштита на потрошувачката кошничка.
„Нема намалување на ДДВ. Нема намалување на акцизата. Нема мерки за заштита на стандардот. Дури Мицкоски кажа дека нема намера да го намали ДДВ за горивата. Граѓаните во Македонија со најниски плати сега ќе плаќаат литар дизел над 100 денари“, изјави Поповиќ.
Од партијата наведуваат дека за само шест месеци цената на дизелот пораснала за 43 проценти, што значи дека полнење на резервоар од 50 литри сега ги чини граѓаните над 1.500 денари повеќе во споредба со пред половина година.
Поповиќ предупреди дека растот на цените на горивата автоматски ќе доведе до зголемување на трошоците за транспорт, производство и земјоделство, што дополнително ќе ја поскапи храната.
Според неа, потрошувачката кошничка веќе достигнала речиси 70.000 денари, додека платите стагнираат, а половина од семејниот буџет заминува за храна и пијалаци.
„Секој нов денар на лебот, млекото, зеленчукот и овошјето директно удира врз семејната трпеза. Животниот стандард на граѓаните се намалува, а Владата не презема ништо“, рече таа.
Од СДСМ порачаа дека бараните две мерки директно ќе ги намалат цените на сите горива и ќе влијаат врз стабилноста на вкупните трошоци за живот, упатувајќи апел до Владата: „Ајде барем еднаш прифатете нешто добро за граѓаните.“