За една деценија бројот на првачиња во Македонија е намален за речиси 9.000. Во 2016 година во прво одделение биле запишани 23.266 деца, додека за новата учебна година досега се запишани околу 14.500 првачиња. Од Министерството за образование и наука нагласуваат дека бројката сè уште не е конечна, бидејќи уписите продолжуваат до крајот на септември.
Трендот на намалување трае со години. Лани во училиште тргнале 17.921 прваче, што значи дека само за една година бројот е намален за повеќе од 3.000 ученици. Како главни причини се посочуваат нискиот наталитет и иселувањето на младите семејства од земјата.
Поради сè помалиот број ученици, годинава се очекува да бидат затворени 26 подрачни училишта во руралните средини во кои нема новозапишани првачиња или има само по неколку ученици. Министерката за образование Весна Јаневска информираше дека во основното образование веќе има околу 200 паралелки помалку, а во средното околу 100.
Според Јаневска, целта е учениците од малите подрачни училишта да бидат префрлени во поголеми централни училишта каде што ќе имаат подобри услови за образование и социјализација. Комбинирани паралелки ќе останат таму каде што најблиското училиште е оддалечено повеќе од 15 до 20 километри.