Европската Унија подготвува промени во процесот на проширување, со постепена интеграција на земјите-кандидатки, построги проверки и посилни механизми за заштита на демократијата и владеењето на правото. Новиот пристап го најави еврокомесарката за проширување Марта Кос, која оцени дека „светот се променил и проширувањето мора да се промени со него“.
Кос, на Конференцијата на хрватските амбасадори во Загреб, посочи дека Европската комисија ќе предложи четири клучни области за реформа – промени во функционирањето на самата Унија, посилни демократски заштитни механизми, постепена интеграција на кандидатите и преодни мерки за идните членки.
Една од идеите е да се намали бројот на области во кои една земја-членка може самостојно да блокира одлуки на целата Унија. Според Кос, дел од институционалните промени би можеле да се спроведат и без измена на основните договори на ЕУ.
Посебен акцент е ставен на спречувањето демократско назадување кај новите членки. Кос порача дека ЕУ мора да обезбеди дека во Унијата нема да влезат „тројански коњи“, ниту сега, ниту за десет или дваесет години. Како причина за воведување посилни механизми се наведуваат досегашните проблеми со почитувањето на европските вредности во дел од членките.
Новата методологија треба да ја напушти логиката „сè или ништо“ и на кандидатите да им овозможи дел од придобивките од членството уште пред формалниот прием. Како примери се наведуваат пристапот до Единствената европска зона за плаќања – СЕПА и поврзувањето со европската енергетска мрежа.
Кос го издвои напредокот на Црна Гора и Албанија, како и Украина и Молдавија. Според неа, ЕУ се наоѓа пред нов „Хелсиншки момент“, споредлив со периодот што му претходеше на големото проширување по Студената војна. Европските лидери за реформата на процесот на проширување треба подетално да разговараат во октомври.