Владата предводена од ВМРО-ДПМНЕ е фокусирана на изградба на модерен, функционален и достапен здравствен систем преку инвестиции во клучните здравствени установи, истакна пратеничката Александра Николовска на денешната прес-конференција.
Таа посочи дека фокусот е ставен на реализација на Клиничката болница во Штип, Клиничката болница во Тетово, Здравствениот дом во Кичево со проширена дејност, како и студентскиот дом и Факултетот за медицински науки. За овие проекти веќе е објавен меѓународен повик за финансиери и се добиени поволни индикативни понуди.
Паралелно, Николовска истакна дека се разгледува изградбата на новиот Клинички центар во Скопје, а една од потенцијалните локации е кај базенот „Борис Трајковски“.
„Станува збор за локација во приватна сопственост и во тек се разговори со сопственикот за можност за замена на земјиштето. Нашата визија е да изградиме ултрамодерен клинички центар кој нема да биде само за Скопје и за граѓаните на Македонија, туку ќе создаде можност за да привлекуваме пациенти и од соседните држави“, рече Николовска.
Таа додаде дека планот предвидува и топол подземен премин под булеварот „Илинденска“ за поврзување со болницата „8-ми Септември“, како и заокружување на целиот комплекс заедно со ПЕТ центарот и поликлиниката „Букурешт“.
Во однос на извршените реконструкции, Николовска ги издвои вложувањата во оперативниот блок, интензивната нега, патологијата и лабораторијата во „8-ми Септември“, одделението за трауматологија во Старата градска болница, како и инвестициите во ГАК вредни околу 110 милиони денари за реконструкција и современа опрема.
„Во Клиничкиот центар Мајка Тереза веќе се реконструирани шест операциони сали, а во следните неколку месеци се очекува да бидат пуштени во употреба уште 4 современи операциони сали. Тоа значи дека ќе имаме вкупно 10 модернизирани операциони сали“, нагласи Николовска, додавајќи дека Владата инвестира денес за подобро здравство утре.