Македонија се рангираше на 30-то место во светот од вкупно 155 земји според Националниот индекс за сајбер-безбедност на естонската Академија за е-управување, соопшти денеска пратеничката и член на ИК на ВМРО-ДПМНЕ, Драгана Бојковска.
Со освоени 84,17 поени, земјава бележи скок од 29 позиции во споредба со рангирањето од 2023 година, кога се наоѓаше на 59-то место.
Според Бојковска, овој резултат е потврда дека Владата предводена од ВМРО-ДПМНЕ воспоставува поорганизиран и сериозен пристап кон дигиталната безбедност.
„Еден од клучните чекори во тој процес е новата законска рамка. Со неа, за првпат на јасен начин се определуваат надлежностите на Министерството за дигитална трансформација во делот на безбедноста на мрежните и информациските системи“, истакна таа.
Пратеничката објасни дека новите правила носи конкретни механизми за управување со ризиците и заштита на критичната инфраструктура.
„Се воспоставуваат конкретни правила за управување со сајбер-ризиците, се воведува обврска за пријавување на безбедносни инциденти и се поставуваат посилни механизми за заштита на суштинските и важните субјекти“, нагласи Бојковска.
Таа додаде дека со ова се менува пристапот кон превенцијата и реакцијата при сајбер-закани.
„Ова е важна промена затоа што сајбер-безбедноста повеќе не се третира како прашање што се решава само кога ќе се појави проблем. Градиме систем во кој постојат јасно дефинирани одговорности, правила и механизми за превенција и реакција“, посочи пратеничката.
Бојковска истакна дека директна корист од овие мерки имаат граѓаните преку побезбедни дигитални услуги и подобра заштита на личните податоци.
„Затоа инвестираме во сајбер-безбедноста конкретно и системски со законска рамка, со јасни надлежности и со механизми што треба да дадат долгорочна заштита. Резултатот од Националниот индекс покажува дека сме направиле значаен чекор напред. Ова е потврда дека насоката во која се движи земјата е исправна, но и наша обврска да продолжиме уште посериозно“, заклучи Бојковска.