Селото Чаниште во Мариово во моментов не е загрозено, но пожарот продолжува да се движи во правец на Крушевица и Зовиќ. Во изминатото деноноќие низ земјата се регистрирани 37 пожари на отворен простор, од кои три и натаму се активни.
Според директорот на Дирекцијата за заштита и спасување, Стојанче Ангелов, во реонот на Чаниште нема опасност ниту за селото ниту за трите манастири што се наоѓаат во околината. Огнената линија, сепак, е долга, а силниот и променлив ветер дополнително го отежнува гаснењето.
На терен се ангажирани четири возила „пинцгауер“, тимови на ДЗС и пожарникари од Прилеп. Беше употребен и полициски хеликоптер, но поради конфигурацијата на теренот и силниот ветер неговото дејствување е ограничено. На некои места, наместо да помогне, воздушната интервенција можела дополнително да го разгорува огнот.
Ангелов информираше дека пожарот кај Чаниште се движи во два правца, кон Зовиќ и кон Крушевица. Во пожарот гори ниска вегетација, а главната цел на екипите е огнот да се задржи подалеку од населените места и објектите во реонот.
Состојбата во Чаниште е особено чувствителна поради пожарот што претходниот ден навлезе во делови од селото и зафати куќи и други објекти. Според претходните информации од теренот, биле уништени повеќе од 15 куќи и објекти.
Во истото деноноќие, Центарот за управување со кризи регистрирал вкупно 37 пожари на отворен простор. Три останале активни, еден бил ставен под контрола, а 33 биле целосно изгаснати.
Покрај пожарот во Прилепско, активни жаришта има и во општина Студеничани, каде гори мешана шума во регионот на Моране, Вртекица и Рамни Габер, како и во Македонски Брод, во близина на Драгов Дол и Локвица.
Пожарот на депонијата во Делчево, кој гореше неколку дена, е ставен под контрола. Во повеќе други општини пожарникарите во текот на изминатото деноноќие интервенирале на пожари кои се локализирани и изгаснати.
Поради високите температури и условите погодни за брзо ширење на огнот, надлежните повторно апелираат до граѓаните да не палат оган на отворен простор и веднаш да го пријават секое забележано огниште на бројот 112.