Јавното сообраќајно претпријатие (ЈСП) Скопје воведе нова автобуска линија со број 37, која ќе ги поврзува населбата Радишани во општина Бутел и Карпош 3 преку булеварот „Словенија“.
За новата линија информираше градоначалникот на Општина Бутел, Дарко Костовски, кој ги објави деталите за трасата и термините за поаѓање.
Според објавениот распоред, поаѓањата од Радишани се закажани во 07:25, 08:55, 14:55 и 16:25 часот, додека од Карпош 3 автобусите ќе поаѓаат во 06:40, 08:10, 14:10 и 15:40 часот.
Автобуската линија започнува од последната постојка на линијата 57 во Радишани, продолжува по улиците „Радишанска“ и „Бутелска“, па преку булеварите „Босна и Херцеговина“ и „Словенија“, улицата „Качанички пат“, булеварот „8 Септември“, улицата „Бледски договор“ и булеварот „Илинден“, а завршува на улицата „Манапо“ во близина на трговскиот центар „Сити Мол“.
Возењето ќе се одвива по веќе постоечките автобуски спирки по должината на маршрутата.
„За постојките по должината на трасата ќе се користат постоечките постојки, со можност за воведување дополнителни постојки зљ поврзување со сите делови на градот Скопје, согласно потребите на граѓаните. Заедно создаваме подобра поврзаност и полесен јавен превоз за граѓаните на општина Бутел“, истакна градоначалникот Костовски.