Кризата со западнонилската треска во Скопје ескалира, а состојбата е алармантна поради задоцнетата реакција за дезинсекција, обвини денеска на прес-конференција Александар Давчевски, претседател на Градската организација на СДСМ.
Според Давчевски, во главниот град досега има 35 потврдени случаи, четири починати лица и шестмина кои се наоѓаат на интензивна нега во критична состојба.
Опозициската партија го посочи градоначалникот на Скопје, Орце Ѓорѓиевски, како директен виновник за ваквата состојба на терен.
„Наместо навремена превенција, навремена анализа и системска контрола на жариштата со комарците – градоначалникот и овој пат задоцни. Дури сега се сети дека треба да прска против комарци. Скопје е под опасада од заразни комарци – поради задоцнетите реакции на првиот човек на Градот“, изјави Давчевски.
Тој додаде дека граѓаните во средината на летото се соочуваат со страв од зараза при секое излегување надвор.
„Орце Ѓорѓиевски затаи кога најмногу требаше да делува. Го немаше кога требаше навремено да се прска, пред вирусот да се прошири и пред граѓаните да почнат да заболуваат. Па што правеше? Да не случајно го исчисти Скопје од ѓубре? Да не случајно ги обезбеди ветените автобуси за Скопјани? Да не случано го среди Градски парк после невремето од пред еден месец? Не, ништо од ова не е средено. Се занимаваше со билбордот со коњ со пет нозе, и со дрон го следеше загадувањето на реките во Скопје“, потенцираше Давчевски.
Од СДСМ истакнаа дека граѓаните ја плаќаат цената со сопственото здравје и со сопствените животи.
„Ова е истиот принцип на работа на целата власт на ВМРО: се доцни, се чека проблемот да прерасне во криза, па потоа се глуми дека се преземаа нешто. Орце Ѓорѓиевски не ги заштити Скопјани од комарците! А требаше и мораше. За тоа треба и мора да се одговара, кога би имало институции кои постапуваат по закон“, заклучи претседателот на Градската организација на СДСМ.