СДСМ веќе еден месец бега од политичката одговорност за состојбата во Гостивар, иако заедно со Валбон Лимани ја дели локалната власт во оваа општина, обвини на денешната прес-конференција Миле Лефков, член на ИК и пратеник од редовите на ВМРО-ДПМНЕ.
Од владејачката партија посочуваат дека опозицијата наместо да побара одговорност, го обвинува ВМРО-ДПМНЕ за локалниот проблем со водата.
Еден месец СДС бега од вистината, а таа е дека заедно со Лимани ја делат локалната власт, а со тоа и одговорноста за Гостивар. СДС не побара одговорност од Лимани, а уште помалку ја призна сопствената политичка одговорност како негов партнер во локалната власт – изјави Лефков.
Според ВМРО-ДПМНЕ, кризата во Гостивар била надмината благодарение на директната интервенција на централната власт.
Поради неспособноста на СДС, ДУИ и Партијата на Таравари, Владата предводена од ВМРО-ДПМНЕ ги зема работите под своја контрола и овој проблем се реши – рече Лефков.
Тој додаде дека институциите биле на терен од самиот почеток и презеле сите соодветни чекори за да им помогнат на жителите.
Додека СДС беше зафатена со ширење хистерија и броење чешми низ државата, Владата предводена од ВМРО-ДПМНЕ од прв момент беше со граѓаните на Гостивар и ги презема сите мерки за надминување на кризата, а жителите секој ден бесплатно ги снабдуваше со вода – истакна пратеникот.
Од Центарот за комуникации на ВМРО-ДПМНЕ нагласуваат дека надлежните органи го истражуваат случајот, а водата во Гостивар е повторно безбедна за пиење.