Од 1 јули компаниите од приватниот сектор започнаа со исплата на регресот за годишен одмор, познат како К-15. Минималниот износ што треба да го добијат вработените оваа година изнесува околу 19.116 денари.
К-15, односно регресот за годишен одмор, претставува задолжителен годишен надоместок што работодавачот му го исплаќа на работникот. Тој е наменет како финансиска поддршка за трошоците поврзани со годишниот одмор, а право на регрес има работникот кој во текот на календарската година има најмалку шест месеци непрекинат стаж кај истиот работодавач.
Во Република Северна Македонија, износот на К-15 не е однапред фиксен, туку зависи од периодот во кој работодавачот ќе ја изврши исплатата. За пресметка се зема просечната месечна нето-плата по работник во државата, исплатена во последните три месеци пред месецот на исплатата.
Законскиот минимум за К-15 изнесува најмалку 40% од просечната нето-плата во државата исплатена во последните три месеци.
Максималниот неоданочен износ може да достигне до 100% од просечната плата, односно согласно условите утврдени со гранскиот колективен договор.
Регресот за годишен одмор треба да биде исплатен најдоцна до 31 декември во тековната година.
За неисплата на К-15 се предвидени парични казни за работодавачот, а доколку работникот биде принуден да ги врати парите во готовина, предвидена е и можност за затворска казна до една година.