Претседателката, како Врховна командантка на вооружените сили, денеска се обрати на централната прослава на 18 Август – Денот на Армијата, којашто се одржа во Охрид.
Честитајќи го најголемиот македонски воен празник, таа истакна дека армијата растела и зреела, но не се изгубил континуитетот со нејзините почетоци: се стекнувало искуство, се проширувало и продлабочувало знаењето, се менувале генерациите, а секоја од нив давала свој придонес или вградувале свое камче во македонскиот мозаик.
За неа, современата одбрана не се сведува на одговор на веќе настанатите закани, туку на нужноста и способноста за нивно предвидување, подготовка на соодветни капацитети и градење отпорност којашто ќе ја гарантира и зачува функционалноста на државата и тогаш кога условите се најнеизвесни и најнепредвидливи.
Сиљановска-Давкова со Орден за воени заслуги ги одликуваше:
- Командата за операции, за особениот придонес за изградбата, развојот, зајакнувањето на капацитетите и за зголемувањето на борбената готовност на македонската Армија како клучен заштитник на суверенитетот и територијалниот интегритет на државата и
- Центарот за одгледување и дресура на кучиња, за исклучителните резултати во извршувањето на своите специфични задачи и за исполнувањето на мисијата како особено значајна структура на македонската Армија.
„Уверена сум дека денешните одликувања, како наша и моја должност, но и радост, ќе бидат потстрек за уште поголема посветеност, заложба и успех во исполнувањето на воените задачи на Армијата.“ – рече таа.
Врз основа на резултатите и оценките постигнати за време на школувањето на Воената академија во периодот од 2022 до 2026 година, им беа доделени плакети на трите најуспешни потпоручници: Марија Недева, Наталија Кочоска и Антонела Јакимовска.
Според Сиљановска-Давкова, не смее да се занемари важноста на придонесот на жените за успехот на македонската армија, кои со своето знаење, креативност и посебна женска енергија ја облагородуваат армиската професија.
Претседателката укажа дека не смееме да заборавиме дека секој што напишал барем неколку реченици во недовршената армиска приказна, оставил трага во воената историја, а оние што денес носат армиска униформа се современи армиски автори.