Хрватската писателка, новинарка и колумнистка Ведрана Рудан почина на 76-годишна возраст по долга и тешка битка со ракот. Веста за нејзината смрт ја потврдиле извори блиски до семејството.
Утрово на нејзиниот официјален профил беше објавена кратка порака со која беше навестено дека Рудан починала.
Денес особено потресно звучи нејзината последна објава на нејзниот блог. Таа ја објави на 26 јули под насловот „Медицинските сестри ќе здивнат кога ќе издивнам“, а во неа пишуваше за својата здравствена состојба, смртта која ѝ се приближува, семејството кое се грижело за неа, но пред сè за медицинските сестри на онкологија во Риека.
Рудан текстот го започна со опис на условите на риечката онкологија, кои, како што наведе, биле особено тешки за време на летните горештини. Пишуваше за медицинските сестри кои, според неа, работат исцрпувачки смени, а притоа на пациентите им повторуваат дека токму ним им е најтешко.
„Јас сум во групата ‘на оние на кои им е најтешко’. Затоа знам дека мене не ми е најтешко. Ќе умрам, ќе умрат и други“, напиша таа.
Откри дека еден ден претходно била на контролен преглед, а потоа опиша како изгледале нејзините денови дома. За неа тогаш веќе се грижело семејството.
„Супа, чај, цврста, мека храна, миење во кревет, изнесување од собата на вишокот од мојот материјал… Глумам дека дремам. Ми е срам. На што споднав“, напиша Рудан.
Кога на семејството му кажувала како се чувствува поради сето тоа, секогаш го добивала истиот одговор: „Ти си наша.“
Рудан потоа раскажа приказна која ја слушнала за време на една од нејзините последни посети на болницата.
Докторката Ивана, како што ја нарекла Рудан, одлучила барем накратко да им овозможи на своите колеги да избегаат од болничкото секојдневие. Изнајмила брод и музика, а на еднодневен излет ги поканила колегите кои можеле да присуствуваат.
„Се танцуваше, се пееше, се смееше. Помеѓу Црес и Крк по Јадранот пловеше бродот на веселбата“, опишала Рудан.
Но, зад оваа навидум убава слика, според неа, се криела многу потешка реалност – луѓе кои секојдневно се соочуваат со болест, страдање и смрт, работејќи смени кои Рудан ги сметала за нехумани.
Ведрана Рудан е родена на 29 октомври 1949 година во Опатија. Студирала хрватски и германски јазик на Педагошката академија во Риека, а во текот на професионалната кариера работела како новинарка, радио-уредничка и телевизиска водителка.
Како писателка стана позната по својот краток, остар и провокативен стил. Без задршка пишуваше за семејството, љубовта, општеството, политиката, насилството и положбата на жената.
Нејзините дела се преведени на повеќе јазици, вклучително и на македонски, а според нејзините книги се поставувале и театарски претстави во повеќе европски градови.
Зад себе остави богат книжевен и новинарски опус, но и препознатлив јавен глас кој со децении предизвикуваше реакции, полемики и дебати.