Моќен звук, извонредна музичка енергија и публика која со воодушевување ја проследи
секоја изведба , концертот „Македонски сновиденија“ на Националниот џез оркестар приреди
вечер за паметење на сцената на Долни Сарај, во рамките на 66. издание на фестивалот
Охридско лето.
Под диригентската палка на Владимир Николов, врвните музичари ја поведоа публиката низ
уникатно музичко патување во кое македонскиот фолклор се сретна со слободниот и
современ јазик на џезот. Новите аранжмани на познатите народни мелодии и оригиналните
авторски композиции прозвучија автентично, смело и светски.
Еден од впечатливите моменти на вечерта беше изведбата на „Билјана платно белеше“, во
нов џез-аранжман на Гордан Спасовски, создаден по иницијатива на А1 Македонија.
Познатата македонска мелодија доби нов музички живот и силно одекна пред охридската
публика.
Дополнителна енергија на концертот му даде специјалниот гостин Питер Сомуа,
наградуваниот трубач од Гана, кој со својот препознатлив музички израз внесе спој на џез,
фанк, соул и западноафрикански ритми.
“Видовме колку моќно може да звучи македонската традиција кога ќе се претстави на
современ и храбар начин. Како генерален спонзор на Охридско лето, горди сме што
придонесуваме за создавање вакви културни доживувања и што по наша иницијатива
„Билјана платно белеше“ доби нов џез-звук. Ова беше вечер што ја потврди силата на
културата да нè поврзува и да создава спомени што долго траат” , изјави Бранкица
Толевска, раководителка на одделот бизнис-трансформација, корпоративна
стратегија и корпоративни комуникации во А1 Македонија.
По успешните настапи во Будимпешта, Прага, Виена и стоечките овации во престижниот
центар Bozar во Брисел, „Македонски сновиденија“ ја донесе својата светска енергија дома,
на една од најубавите сцени на Охридско лето.
Со оваа концертна вечер, А1 Македонија уште еднаш ја продолжи својата „Културна врска“ со
фестивалот и со публиката, поддржувајќи ја македонската култура во нејзиниот најсовремен,
најавтентичен и најмоќен израз.