И покрај тоа што силниот ветер постојано го менува правецот и отвора нови жаришта, спасувачките екипи во Црна Гора досега успеале да одбранат стотици загрозени објекти.
Пожарот, кој во текот на ноќта се проширил од подрачјето над Бијела и Баошиќи кон Зеленика и Каменари, од утрово дополнително го гаснат два противпожарни авиона и еден хеликоптер на Министерството за внатрешни работи и Армијата на Црна Гора.
„Се позициониравме на сите клучни точки и ги браниме загрозените куќи. Ситуацијата е сложена, но имотот што беше директно загрозен засега е спасен“, изјави командирот на Службата за заштита и спасување на Херцег Нови, Златко Ќировиќ.
Противпожарните екипи и дополнителните сили од други црногорски општини се на терен повеќе од 48 часа без прекин. Во знак на поддршка, повеќе од 100 локални жители понудиле сместување и можност за одмор на исцрпените спасувачи.
Полицијата во меѓувреме упати апел до граѓаните да не се упатуваат самоволно кон погодените подрачја и строго да ги почитуваат насоките на Кризниот штаб.
Ситуацијата дополнително ја отежнуваат екстремно високите температури, кои достигнуваат до 39 степени Целзиусови, како и засилениот северен ветер. Неповолните временски услови создаваат проблеми и во други делови на земјата.
Поради повторното разгорување на пожарите кај локалитетите Владимир и Шас, во близина на Улцињ, најавено е пренасочување на еден противпожарен авион кон тој регион.
Активни пожари се регистрирани и на повеќе локации во подрачјето на Кусида, кај Никшиќ, поради што надлежните служби продолжуваат со интензивно гаснење и следење на состојбата.