Големата евакуација на Халкидики се префрли и на море. Туристите и жителите се извлекуваат со пловила од подрачјето зафатено од големиот шумски пожар кај Сивири и Фурка.
Повеќе од 347 лица веќе се безбедно пренесени до марината Сани, објавија грчките медиуми, додека уште околу 92 лица се качиле на брзиот брод „Спидранер џет“. Во масовната поморска операција учествуваат два брода на крајбрежната стража, два на противпожарната служба, како и приватни пловила, три рибарски и еден туристички брод.
Истовремено продолжува и евакуацијата по копнен пат. Автобуси на локалната превозничка служба се упатени кон Сивири и Фурка за да ги преземат граѓаните и туристите, откако преку системот за итни предупредувања „112“ беа испратени пораки за итна евакуација кон Мола Калива.
Познатиот македонски композитор Дарко Димитров, кој се наоѓа во загрозеното подрачје, испрати снимки од пожарот од Сивири до порталот „Црнобело“, наведувајќи дека пораките за евакуација се примени, но дека на главниот пат се создале големи гужви. Според снимките, пламените јазици се стигнати прилично блиску до куќите.
Огнена стихија на терен
Во акцијата за гаснење на пожарот ангажирани се 122 пожарникари со три специјализирани тимови за шумски пожари и 41 противпожарно возило. Од воздух интервенираат дури 9 авиони и 7 хеликоптери, од кои еден има координативна улога. Како поддршка на терен помагаат и цистерни на локалните власти и тешка градежна механизација.