Охридскиот рамковен договор е дел од нашата понова историја и од политичката и институционалната реалност на државата, порача премиерот Христијан Мицкоски по повод годишнината од неговото потпишување.
Тој истакна дека на овој документ треба да се гледа со зрелост, почит кон различните ставови и одговорност кон иднината.
Свесни сме дека Рамковниот договор различно се доживува и толкува меѓу граѓаните. Историјата не треба да ја приспособуваме на дневната политика, ниту да очекуваме сите да имаат ист однос кон настаните од минатото. Но, наша обврска е од минатото да извлекуваме поуки и да градиме држава во која различностите нема да бидат причина за поделби, туку реалност со која управуваме мудро, одговорно и во рамките на институциите – порача Мицкоски.
Премиерот нагласи дека денешните генерации очекуваат функционални институции, еднаквост пред законите, подобар животен стандард и економски развој.
Време е политиката сè помалку да се занимава со тоа што нè разделува, а многу повеќе со она што заеднички треба да го изградиме. На Македонија ѝ е потребно општество во кое вредноста на човекот нема да се мери според неговото потекло, туку според неговото знаење, труд, чесност и придонес кон заедницата. Држава во која институциите ќе му служат на граѓанинот и во која напредувањето ќе зависи од способноста и резултатите – истакна тој.
Според него, главната одговорност денес е создавање стабилна и сигурна држава каде сите ќе се чувствуваат еднакви.
Минатото не можеме да го промениме, но можеме да одлучиме каква иднина ќе изградиме. Таа иднина мора да биде ослободена од етнички тензии, политички манипулации и поделби кои со години се користеа како замена за резултати. Наместо тоа, потребни ни се работа, развој, ред, меѓусебна почит и силни институции – истакна Мицкоски.
Тој заклучи дека обврската кон идните генерации е да им се остави постабилна, поуспешна и поправедна држава каде заедничката иднина е посилна од сè што нè дели.