Претседателот на ОК на ВМРО-ДПМНЕ Гостивар, Мартин Андоновски, на денешната прес-конференција го повика Јавното обвинителство да ги истражи документите и извештаите за квалитетот на водата за пиење во Гостивар од периодот кога СДСМ беше на власт.
Според Андоновски, тогашното раководство и надлежните функционери не преземале ништо и покрај постоењето на бројни документи што укажувале на неисправност на водата.
„СДС и актуелното раководство се последни кои можат да зборуваат и критикуваат за ситуацијата во Гостивар со водата. А зошто, бидејќи за периодот додека биле на власт има извештаи кои јасно укажуваат дека водата во Гостивар не била со соодветен квалитет“, изјави Андоновски.
Тој директно ги посочи поранешниот министер за здравство Венко Филипче и тогашната директорка на Државниот санитарен и здравствен инспекторат, Рената Младеновска.
„Во тој период, актуелното раководство на СДС како Венко Филипче и Рената Младеновска молчеле. Филипче како министер за здравство и Рената Младеновска како директор на Државниот инспекторат за санитарен и здравствен инспекторат не мрднале ни со прст по ниту еден извештај за неисправноста на водата во Гостивар. Молчеле што укажува дека се грижеле за функциите, власта и интересите на мала група на луѓе од власта. Филипче и Младеновска замислете уста не отвориле за околу 400 документи кои укажувале дека водата во Гостивар не била со соодветен квалитет“, рече Андоновски.
За разлика од претходниот период, претседателот на општинскиот комитет нагласи дека сегашните институции реагирале брзо за да се реши проблемот.
„За разлика од нив, од оние седум години владеење на СДС, сега Владата и сите надлежни институции реагираа веднаш, по што за само една недела граѓаните на Гостивар добија технички исправна вода. Во меѓувреме, секојдневно се работи на тоа граѓаните на Гостивар да добијат и флаширана вода за пиење додека се санира ситуацијата и водата не ги добие сите соодветни карактеристики што ќе укажат дека е и за пиење“, посочи тој.
Андоновски заклучи дека правосудните органи мора да го испитаат случајот поради далечинските последици врз здравјето на граѓаните.
„Сега останува само надлежните институции од правосудството да реагираат, поточно јавното обвинителство, да ги истражи документите од тој период бидејќи последиците се далекусежни“, изјави Андоновски.