Албанија во 2026 година ја зголеми површината на своите јавни плажи за над 300.000 квадратни метри, што претставува раст од над 10 проценти на годишно ниво, објави агенцијата АТА, повикувајќи се на изјава на албанскиот министер за туризам, култура и спорт, Бленди Гонџја.
Во текот на оваа летна сезона, вкупната површина на јавните плажи достигна 3,18 милиони квадратни метри, односно зголемување од 10,5 проценти во споредба со минатата година, кога изнесуваше 2,88 милиони квадратни метри.
Во истиот период, бројот на парцели наменети за јавни плажи забележа раст од 67 проценти, зголемувајќи се од 1.014 на вкупно 1.689.
-Проширувањето на површината на јавните плажи придонесува и со враќањето под државно управување на вкупно 665 парцели со вкупна површина од близу 768.000 квадратни метри, кои претходно ги управуваа приватни лица, додаде министерот.
Министерот истакна дека годинава за првпат се обезбедени 124 општински плажи со површина од околу 475.000 квадратни метри, дадени на директно управување на локалните власти.
Најголем дел од овие површини се наоѓаат во општина Драч, со околу 316.000 квадратни метри. Следуваат Лежа со 75.000, Химара со 51.000, Валона со 21.000 и Скадар со 13.000 квадратни метри.