Во организација на Асоцијацијата „Макам-транс“, денеска се одржа регионална средба на претставници на здруженијата на превозници од Македонија, Србија, Босна и Херцеговина и Црна Гора.
Главна тема на состанокот беа актуелните проблеми со кои се соочуваат професионалните возачи во однос на ограничувањето и броењето на деновите за престој во Шенген зоната, како и дефинирање чекори за надминување на оваа состојба.
Претставниците на сите здруженија потврдија дека постои заеднички став за изнаоѓање соодветно и одржливо решение, имајќи го предвид значењето на професионалните возачи и транспортниот сектор за економиите во регионот и непреченото одвивање на меѓународниот превоз.
На средбата беше истакната потребата од интензивирање на комуникацијата со релевантните институции на Европската Унија и изнаоѓање решение од страна на Европската комисија. Ова решение, како што беше посочено, мора да ги земе предвид специфичностите на професионалните возачи кои секојдневно ја вршат својата работа на територијата на земјите од Шенген зоната.
Од „Макам-транс“ информираат дека регионалната соработка и заедничкото делување ќе продолжат и во наредниот период со цел да се обезбеди непречено функционирање на транспортниот сектор.