Портпаролот на ВМРО-ДПМНЕ, Валентин Манасиевски, на денешната прес-конференција упати критики до опозициската партија, обвинувајќи ги дека наместо да понудат идеи и резултати, се фокусираат на создавање конфликти и поделби.
Манасиевски порача дека таквата политика на опозицијата има за цел да го привлече вниманието на јавноста преку инциденти.
„Почитувани, кога немаат идеи и резултати, во СДС произведуваат конфликти за да останат во центарот на вниманието. Суштината на политиката што ја гледаме од раководството на талогот Венко Филипче е Македонија да зборува за инциденти, расправии и поделби. Затоа што тие се навикнати на таков начин на водење на држава, па сега мислат дека така повторно ќе дојдат на власт“, изјави Манасиевски.
Според портпаролот на ВМРО-ДПМНЕ, конкретен пример за ова биле и последните случувања на терен.
„Таа политика излезе на виделина кога пратија осудени насилници да направат инцидент во Ново Село токму кога и претседателот Мицкоски беше таму. Ефтимов и Стојанов, децата на Заев, осудени насилници без проблеми се ставија на располагање на Филипче и без никакво размислување отидоа да направат инцидент“, истакна тој.
Тој заклучи дека граѓаните ги препознаваат ваквите намери и дека не очекуваат ништо друго освен манипулации.
„Но граѓаните ги прочитаа. Граѓаните знаат дека од овој СДС освен создавање на хаос и инциденти, проблеми и манипулации, друго и не може да се очекува“, порача Манасиевски.