Европските берзи денес забележаа благ раст при што клучните индекси достигнаа нови рекордни максимуми, додека цените на нафтата повторно се искачија над 89 долари за барел поради неизвесноста околу договорот за Ормускиот теснец меѓу САД и Иран.
Цената на суровата нафта Брент порасна за 1,77 проценти и утрово се тргуваше по 89,306 долари, додека американската сурова нафта WTI забележа раст од 2,06 проценти, достигнувајќи 83,864 долари за барел.
Индексот STOXX 50 забележа раст од 0,2 проценти, а пан-европскиот индекс STOXX 600 порасна за 0,1 процент. Позитивниот тренд беше главно предводен од силните квартални резултати на компаниите кои ја зголемија довербата кај инвеститорите.
Технолошкиот сектор исто така забележа позитивно движење по веста дека американскиот гигант Intel собрал 20 милијарди долари преку продажба на акции, додека Nvidia објави планови за обезбедување до 500 милијарди долари за финансирање на инфраструктура за вештачка интелигенција.
Поради поскапувањето на суровата нафта, пораснаа и акциите во енергетскиот сектор, но повисоките цени на горивата негативно се одразија врз туристичките компании.
На отворањето на берзата TTF во Амстердам, европските фјучерси за гас за септември се тргуваа по цена од 62,025 евра за мегават-час.
На валутната берза Форекс, еврото денес се тргуваше по курс од 1,15330 долари.
Цената на златото забележа пад на 4.359,43 долари за тројанска унца, додека пченицата забележа раст и се искачи на 6,4458 долари за бушел.
За разлика од европските пазари, американските берзански индекси го завршија тргувањето во понеделник со пад. Дау Џонс падна за 0,11 проценти на 53.975,98 поени, S&P 500 забележа пад од 0,06 проценти на 7.753,11 поени, а Nasdaq се намали за 0,32 проценти, завршувајќи на 26.605,36 поени.