Управата за јавни приходи (УЈП), во соработка со Заедницата на единиците на локалната самоуправа (ЗЕЛС), организираше обука за подготовка на општините и јавните комунални претпријатија за воведување на системот е-Фактура. На обуката учествувале 80 претставници од општините и јавните претпријатија.
На учесниците им биле презентирани функционалностите на системот, начинот на користење, како и обврските и придобивките од електронското фактурирање. Тимот на УЈП ги запознал присутните и со бесплатната веб-апликација преку која ќе може да се користи системот, а биле разгледани и прашања поврзани со неговата практична примена.
Од УЈП ги повикале општините и ЈКП активно да го тестираат системот и навремено да доставуваат предлози за негово подобрување. Особено внимание било посветено на можноста ЈКП да испраќаат поголем број фактури до граѓаните, поврзувањето на постојните информациски системи со е-Фактура и користењето на веќе постоечки квалификувани електронски сертификати.
Во пилот-фазата системот може да се тестира преку директно поврзување со деловните информациски системи преку API-интерфејс или преку веб-апликацијата.
Во моментов се тестираат повеќе функционалности, меѓу кои креирање, прием, валидација, преземање, прифаќање, одбивање и сторнирање на електронски фактури. Во следниот период се планира постепено проширување на тестирањето до целосно вклучување на сите процеси и видови документи.
Од УЈП оценуваат дека навременото вклучување на општините и јавните претпријатија е особено важно, бидејќи ЈКП се меѓу најголемите издавачи на фактури во јавниот сектор.
УЈП најавува и продолжување на информативните и едукативните активности за навремена подготовка на сите обврзници за примената на системот е-Фактура, со кој се очекува поефикасно и побрзо фактурирање и поголема транспарентност на деловните процеси.