Во Охрид денеска ќе се одржи дискусија посветена на врсничкото насилство и вандализмот, со фокус на предизвиците со кои се соочуваат младите во училиштата и дигиталниот простор.
На средбата во вилата „Билјана“ ќе учествуваат младински активисти, ученици, психолози и експерти. Настанот се организира во пресрет на 12 Август – Меѓународниот ден на младите.
Пред присутните ќе се обратат претседателката Гордана Сиљановска-Давкова и министерката за образование и наука Весна Јаневска.
Како што информираат од Кабинетот на претседателката, дискусијата е иницирана од Советот за млади и има цел да поттикне институционална дебата за справувањето со врсничкото насилство.
Ќе се разговара за примената на протоколите во училиштата, начините на поддршка на жртвите и пристапите за промена на однесувањето кај сторителите на насилство.
Една од темите ќе биде и можноста за воведување политики со кои би се ограничило или регулирало користењето на социјалните мрежи кај децата и младите на возраст од 14 до 16 години.