Топлотниот бран продолжува да ја зафаќа земјава, а денеска температурите ќе достигнат и до 40 степени. Според прогнозите, сончево и многу топло ќе биде и утре, додека од четврток се очекува благо освежување и пад на температурите за неколку степени.
Здравствените власти апелираат граѓаните да бидат особено внимателни поради високите температури. Се препорачува да се избегнува непотребно излегување во најтоплиот дел од денот, односно од 11 до 17 часот, да се носи лесна и светла облека и да се внесуваат повеќе течности.
Од Институтот за јавно здравје (ИЈЗ) посочуваат дека треба да се избегнуваат големи температурни разлики меѓу климатизираните простории и надворешниот воздух. Доколку надворешната температура е околу 39 степени, клима-уредите е препорачливо да се постават на околу 25 степени, за организмот полесно да се прилагоди при излегување.
Особено внимание се препорачува за лицата кои работат на отворено. ИЈЗ советува да се избегнува тешка физичка работа во периодот од 11 до 17 часот, а доколку работните обврски мора да продолжат, да се прават почести паузи, да се престојува во сенка и редовно да се внесуваат течности.
Во текот на топлотниот бран се препорачува и полесна исхрана, со помалку мрсна и висококалорична храна, како и избегнување намирници со висока содржина на шеќер.
На лицата над 65 години им се советува редовно да ја земаат препишаната терапија и, доколку почувствуваат влошување на состојбата, да се консултираат со матичниот лекар. Постарите лица кои живеат сами треба да останат во контакт со роднини, пријатели или соседи, за навреме да добијат помош доколку почувствуваат симптоми предизвикани од жештините.
Бремените жени треба да ги следат советите од своите матични гинеколози, додека хронично болните лица треба редовно да ја земаат својата терапија.
За дополнителна заштита при излегување се препорачуваат светла и лесна облека, капа, заштитни очила и средства со заштитен фактор од сонце.
Од ИЈЗ предупредуваат дека при појава на симптоми како вртоглавица, силна главоболка, губење на свеста или мускулни грчеви, кои може да укажуваат на топлотен удар, треба веднаш да се побара медицинска помош.