Патнички авион полета од Националниот аеродром „Рејган“ во момент кога претседателскиот хеликоптер со американскиот претседател Доналд Трамп се наоѓаше во близина, со што беа прекршени безбедносните правила.
Федералната управа за авијација на САД (ФАА) отвори постапка за утврдување на причините за нарушувањето на протоколите околу аеродромот во Вашингтон.
Според информациите, патничкиот авион добил одобрение за полетување додека хеликоптерот на претседателот се приближувал кон истото подрачје. Инцидентот се случил во вторник, иако во вакви ситуации важи строга забрана за комерцијални летови.
Претседателскиот хеликоптер „Марин Уан“ полетал од платформа во Белата куќа кон Заедничката база Ендрјуз, како прва етапа од патувањето на Трамп кон западниот брег на САД. Во исто време, од аеродромот „Рејган“ полетал и патничкиот авион.
Авионот се издигнал над претседателскиот хеликоптер, по што двете леталата продолжиле по одделни траектории без непосредна опасност од судир.
„Имаше моментно намалување на пропишаната оддалеченост, по што леталата продолжиле да се оддалечуваат едно од друго“, соопштија од Федералната управа за авијација, додавајќи дека контролорот на летање одржувал постојана врска и со пилотот на патничкиот авион и со екипажот на „Марин Уан“.
Од Белата куќа потврдија дека безбедноста на претседателот не била загрозена.
„Претседателот Трамп во ниту еден момент не бил изложен на ризик. Специјалната единица ’Марин Уан‘ ја управуваат врвни пилоти и безбедноста не била нарушена“, порача портпаролот на администрацијата.
Националниот одбор за безбедност на транспортот соопшти утрово дека продолжува да прибира информации за настанот и дека сè уште не е донесена одлука дали ќе се отвори формална истрага.
Инаку, поострените правила на аеродромот „Рејган“ беа воведени по смртоносната несреќа на 29 јануари 2025 година, кога патнички авион се судри со воен хеликоптер „Блек Хок“ над реката Потомак, при што загинаа 67 лица. По тој трагичен настан, ФАА наложи сите полетувања и слетувања на „Рејган“ привремено да се запираат кога во близина минува хеликоптер.
Во видеоснимка објавена од новинарот Дејв Статер се гледа како авион полетува од пистата „еден“ на „Рејган“ додека претседателскиот хеликоптер минува над Источен Потомак парк, при што вообичаената постапка за запирање на комерцијалните летови не била применета.