На граничниот премин „Табановце“ за влез во државата се чека околу 30 минути, додека на „Богородица“ за излез од земјата времето на чекање е приближно еден час, соопшти Авто-мото сојузот на Македонија (АМСМ).
На останатите гранични премини од македонска страна во моментов нема поголеми задржувања ниту при влез, ниту при излез од државата.
Според информациите на АМСМ, сообраќајот на државните патишта се одвива без поголеми пречки и по суви коловози, додека интензитетот на сообраќајот е зголемен на патните правци надвор од урбаните средини.
Од АМСМ апелираат возачите да ја приспособат брзината на условите на патот, да ја почитуваат сообраќајната сигнализација и да управуваат внимателно, особено низ котлините, речните долини и клисурите, каде што постои ризик од појава на одрони. Посебна претпазливост се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.