Министерот за одбрана, Владо Мисајловски, упати честитка до граѓаните, припадниците на Армијата и вработените во Министерството по повод државниот празник 2 Август – Илинден.
Во своето обраќање, тој посочи дека празникот го претставува темелот на македонската државност и ги потсетува сите на историските идеали.
„Почитувани граѓани, припадници на македонската Армија и вработени во Министерството за одбрана, Во име на вработените во Министерството за одбрана и во мое лично име, упатувам искрени честитки по повод 2 Август – Илинден. Нашиот најголем празник и најсветлиот датум во националната историја нè потсетува на највозвишените идеали – слобода, самобитност, патриотизам и љубов кон татковината“, истакна Мисајловски.
Тој нагласи дека државотворната идеа се протега од Крушевската Република и АСНОМ па сè до денес.
„Илинден е темелот врз кој е изградена современата македонска држава. Од херојството на илинденците и визијата со која беше издигната Крушевската Република, преку државотворните одлуки на АСНОМ до денес, се протега една иста идеја – Македонија да биде слободна, суверена и независна држава. Таа идеја живее и денес во секој од нас, затоа што слободата и мирот што ги уживаме се платени со жртвата на нашите предци“, наведе министерот.
Мисајловски порача дека празникот обврзува на зачувување на единството и градење на просперитетна иднина за сите граѓани.
„Денешниот празник нè обврзува да ги чуваме вредностите на единството, солидарноста, слободата и меѓусебното почитување, градејќи општество во кое секој граѓанин ќе има можност достоинствено да живее и да придонесува за заедничката иднина. Во духот на славното илинденско наследство, да продолжиме со мудрост, единство и решителност да ја градиме Македонија како држава на мирот, демократијата, просперитетот и надежта за идните поколенија. Нека илинденскиот пламен секогаш ни го осветлува патот кон единство, напредок и мир. Нека ни е честит 2 Август – Илинден! Нека ни е вечна Македонија!“, порача Мисајловски.