Големи шумски пожари зафатија повеќе региони низ Грција, а најкритична е состојбата на островот Крит, каде што живот загубија двајца пожарникари за време на интервенција. Уште еден нивен колега почина од здравствени проблеми додека учествуваше во гаснењето на пожарот на Пелопонез.
Грчките служби информираат дека во моментот се активни три големи огнени фронтови: во областа Ретимно и Ситија на Крит, како и кај Пломари на островот Лезбос, додека пожарот во близина на Гитија во Лаконија е ставен под контрола.
Најдраматична е ситуацијата во Ретимно, каде што огнот брзо се прошири на линија од 15 километри, пеплосувајќи шуми и земјоделски површини и загрозувајќи повеќе населени места. Двајца пожарникари на возраст од 25 и 58 години беа пронајдени мртви откако нивното возило било заробено во пламенот во близина на селото Крија Врисис. Според првичните сознанија, тие ја изгубиле ориентацијата поради густиот чад. Во истата акција се повредени и двајца пожарникари-волонтери.
Поради неповолните временски услови и силните ветрови, евакуирани се повеќе населби. Над 700 луѓе од областа Агија Галини со автобуси се префрлени на сигурно, а Бреговската стража и приватни plovila од плажите спасија најмалку 29 лица. Во регионот е активирана и посебна платформа за привремено сместување на луѓето кои останаа без своите домови.
Трагичен епилог имаше и пожарот во Агеранос кај Гитија, каде 50-годишен пожарникар почина од здравствени тегоби за време на акцијата. Сочувство до семејствата изразија министерот за цивилна заштита Евангелос Турнас и премиерот Киријакос Мицотакис.
„Нашите мисли се со нив, како и со сите пожарникари, волонтери и членови на безбедносните сили кои се борат на фронтовите на пожарот во новата сурова реалност со која се соочуваат секоја година“, рече Мицотакис.
Сериозна е состојбата и во Ситија во источен Крит, каде што изгореа две противпожарни возила, а двајца пожарникари се хоспитализирани со изгореници. Силните ветрови кои достигнуваат и седум бофори го оневозможуваат целосната поддршка од воздухот. На Лезбос, пак, наредена е итна евакуација на градот Агиос Исидорос, а при гаснењето еден пожарникар задобил фрактура на ногата.