Три жени се повредени во напад со нож што се случил претпладнево во Париз, а осомничениот напаѓач е уапсен по брза реакција на полицаец кој во моментот не бил на должност.
Нападот се случил околу 11:30 часот во областа Порт де Клиши, во северозападниот дел на француската престолнина.
Според досегашните информации, напаѓачот бил вооружен со два кујнски ножа и нападнал три жени на возраст од 19, 24 и 36 години.
Сите повредени жени веднаш биле пренесени во болница каде што им била укажана медицинска помош.
Францускиот министер за внатрешни работи, Лоран Нуњез, потврди дека осомничениот бил совладан од полицаец во цивил.
„Сторителот е уапсен од полицаец кој не е на должност“, изјави Нуњез, оценувајќи ја неговата интервенција како „храбар чин“.
Според локалните медиуми, една од нападнатите жени наводно е бремена, но оваа информација сè уште нема официјална потврда од властите.
Две од жртвите се здобиле со сериозни повреди во пределот на грбот и стомакот, но според министерот, нивните животи се надвор од опасност.
Осомничениот по апсењето дал некохерентна изјава, а властите засега не го соопштуваат неговиот идентитет ниту мотивот за нападот.
Полицијата ја продолжува истрагата за утврдување на сите околности и евентуалната поврзаност меѓу напаѓачот и жртвите.