Владата воведе ново софтверско решение за интегрирано администрирање на паричните права, социјалните услуги и јавните овластувања, соопшти денеска пратеничката од ВМРО-ДПМНЕ, Драгана Арсова.
На денешната прес-конференција таа истакна дека новиот систем им овозможува на стручните лица во центрите за социјална работа целосно следење на состојбата и ризиците на секое домаќинство.
Според Арсова, во тек е и ревизија на условите за остварување на правото на гарантирана минимална помош.
Пратеничката ги изнесе деталите за затечените состојби и планираните законски измени:
„Приоритет на Владата уште од самиот почеток на мандатот е унапредувањето на системот за социјална заштита. Иако беше наследен системски проблем во начинот на функционирање на системот за социјална заштита, истиот е целосно реформиран преку воведување ново софтверско решение за интегрирано администрирање на паричните права, социјалните услуги и јавните овластувања. Новиот систем им овозможува на стручните лица во центрите за социјална работа дигитализирана алатка за целосно следење на состојбата и ризиците на секое домаќинство. Со тоа се надминува досегашниот модел на поединечно администрирање и се воспоставува социјална политика заснована на реална проценка на потребите и ефикасна поддршка. Во тек е и преиспитување на условите за остварување на правото на гарантирана минимална помош и правото на социјална сигурност. Резултатите од оваа постапка ќе покажат дали постојат пропусти во законските решенија донесени од претходната власт, како и евентуални злоупотреби, врз основа на што ќе бидат подготвени соодветни законски измени.“
Арсова додаде дека паралелно се работи на унифициран систем за проценка на попреченоста, Законот за вработување лица со попречност и на откочување на стручните испити за воспитувачи и негуватели.
Во однос на пензиите и заштитата на најмладите, таа ги посочи веќе реализираните проекти:
„Еден од приоритетите на Владата уште од почетокот на мандатот беше линеарното зголемување на пензиите за сите пензионери. Оваа мерка е целосно реализирана, при што пензиите се зголемени за 7.000 денари за над 330.000 пензионери. Паралелно се реализираат активности за зголемување на капацитетите за згрижување и воспитување на децата од предучилишна возраст преку изградба на нови и реконструкција на постојните детски градинки. Со овие инвестиции е предвидено зголемување на капацитетот за дополнителни 3.515 деца на ниво на целата држава.“
Од ВМРО-ДПМНЕ порачаа дека реализираните мерки се доказ за посветеноста кон градење ефикасен и социјално одговорен систем.
„Спроведените реформи и реализираните мерки се доказ за посветеноста на Владата предводена од ВМРО-ДПМНЕ кон создавање поефикасен, поправеден и посоцијално одговорен систем. Преку конкретни резултати и континуирани инвестиции, се поставуваат темелите за подобар животен стандард и посигурна иднина за сите граѓани“, заклучи Арсова.