Најмалку 20 лица го загубија животот во силни поплави што го зафатија североисточниот дел на Авганистан, пренесува Ројтерс повикувајќи се на информации од талибанските власти.
Бројката на жртви се очекува дополнително да расте, додека стотици луѓе сè уште се водат како исчезнати.
Најтешко погоден е градот Парун, кој е административен центар на источната провинција Нуристан.
Според соопштението од Националниот орган за управување со катастрофи на талибанските власти во оваа област се регистрирани и најмалку 80 повредени лица.
Претставниците на талибанската администрација информираа дека е започната опсежна пребарувачко-спасувачка операција на теренот.
Операциите се одвиваат во оддалечен регион кој се наоѓа во непосредна близина на авганистанско-пакистанската граница.
Спасувачките екипи на терен стравуваат дека допрва ќе се соочат со „големи материјални и човечки загуби“, пренесува Ројтерс.