Во Собранието денеска ќе заседаваат Комисијата за образование, наука и спорт, Комисијата за одбрана и безбедност, Законодавно-правната комисија, Комисијата за надворешна политика и надворешна трговија, како и Комисијата за еднакви можности на жените и мажите.
Комисијата за одбрана и безбедност ќе расправа за Предлог-одлуката за изменување на Одлуката за продолжување на рокот на кризна состојба поради можност од нарушување на снабдувањето со нафта и нафтени деривати на територијата на Република Северна Македонија.
Пред членовите на Комисијата за образование, наука и спорт ќе се најдат три законски предлози во прво читање – Предлог-законот за високото образование, Предлог-законот за обезбедување квалитет во високото образование и науката и Предлог-законот за научноистражувачката дејност.
Истите два предлог-закона поврзани со високото образование ќе бидат разгледувани и на седница на Законодавно-правната комисија, исто така во прво читање.
Комисијата за надворешна политика и надворешна трговија ќе ги разгледа платформите за дипломатските активности на тројца новоименувани вонредни и ополномоштени амбасадори. Илина Мангова е предложена за амбасадор во Обединетото Кралство, Стојанче Китаноски во Комонвелтот Австралија, а Линда Салиоска Иљазоска во Кралството Холандија.
Комисијата за еднакви можности на жените и мажите ќе одржи надзорна расправа на тема спроведувањето на законите, политиките и институционалните мерки за превенција и заштита од семејно насилство, со акцент на еднаквите можности, институционалната координација и можностите за унапредување на ефикасноста на постапувањето на институциите.