Во изминатите денови полицијата евидентирала повеќе случаи на семејно насилство и физички напади во неколку градови низ државата, при што има приведени лица, поднесени кривични пријави и активни истраги.
СВР Тетово поднесе кривична пријава против Р.С. (38) од тетовско поради сомнение за кривичното дело „телесна повреда“, откако на 31 мај годинава во семејната куќа физички ја нападнал својата 56-годишна мајка.
ОВР Кратово, пак, поднесе кривична пријава против Ѓ.М. (56) од Кратово поради сомнение за „загрозување на сигурноста“. Според пријавата, на 15 јуни таа физички ја нападнала својата 73-годишна сосетка.
Во Кочани, 75-годишна жена пријавила дека таа и нејзиниот малолетен внук биле физички и психички малтретирани од нејзината ќерка Б.В.. Полицијата презема мерки за расчистување на случајот.
Во Охрид, полицијата го лишила од слобода В.Т. (61), кој во семејниот дом со остар предмет им се заканувал на членови на своето семејство. По целосното документирање на случајот ќе следува соодветна пријава.
Во Скопје, 36-годишен маж пријавил дека бил физички нападнат од неговата партнерка А.П. во нивниот дом на подрачјето на Гази Баба. За случајот се води истрага.
Во Гостивар, полицијата го приведе А.З. (42), откако неговата 38-годишна сопруга пријавила дека била физички нападната во семејниот дом. По документирањето на случајот ќе биде поднесен соодветен поднесок.
Уште едно приведување имало во тетовско, каде полициски службеници го лишиле од слобода Б.Р., по пријава дека во семејниот дом физички ги нападнал својата сопруга и нејзиниот татко. И за овој случај ќе следува соодветен поднесок по завршување на постапката.