Поранешниот директор на италијанската компанија за автопати „Аутостраде пер л’Италија“, Џовани Кастелучи, е осуден на 12 години затвор поради уривањето на мостот Моранди во Џенова во 2018 година, кога животот го загубија 43 лица, објави Би-би-си.
Кастелучи беше меѓу вкупно 57 обвинети во судскиот процес што се водеше во Џенова. Обвинителството бараше значително повисока затворска казна за него. Тој веќе издржува шестгодишна затворска казна за сообраќајна несреќа од 2013 година.
На 11 години затвор е осуден и поранешниот висок функционер на компанијата, Микеле Донфери Мители.
По објавувањето на пресудата, семејствата на жртвите изразија задоволство од одлуката на судот.
„Многу сум задоволен“, изјави за италијанската телевизија Емануел Дијаз, чиј брат Хенри загина во трагедијата.
Егле Посети, која во несреќата ги загубила сестра си и нејзиното семејство, оцени дека 12-годишната казна за Кастелучи е „прифатлива“.
Во текот на судењето, сите обвинети ја негираа вината. Обвинителството тврдеше дека одржувањето на дотраениот мост било со години одложувано и дека биле игнорирани предупредувањата за неговата состојба. Одбраната, пак, тврдеше дека до несреќата дошло поради грешка во дизајнот и поради конструктивно решение при кое одреден кабел бил обложен со бетон.
Меѓу обвинетите беа инженери од компанијата за одржување „Спеа“, поранешни функционери од италијанското Министерство за транспорт, како и претставници на матичната компанија „Атлантија“.
Поранешниот извршен директор на „Спеа“, Антонино Галата, е осуден на пет и пол години затвор, додека поранешниот директор на автопатската дирекција во Министерството за транспорт, Мауро Колета, доби петгодишна затворска казна.
Пред почетокот на судскиот процес, актуелниот директор на „Аспи“, Ариго Џана, јавно се извини во име на компанијата за трагедијата.
„Постапките и одлуките на некои луѓе оставија неизбришливи траги“, изјави тој.
Мостот Моранди се урна за време на силен дожд во екот на туристичката сезона во август 2018 година, при што десетици автомобили и камиони паднаа во бездната.
Новиот мост, проектиран од прочуениот италијански архитект Ренцо Пијано, беше пуштен во употреба во 2020 година.