Куба, во рок од една недела, третпат е без електрична енергија, соопшти денеска кубанското Министерство за енергетика.
Ова е трет ваков голем прекин на снабдувањето на целиот остров во рок од само десет дена, што дополнително ја урива и онака дотраената енергетска мрежа во земјата и ги остава милионите граѓани во целосен мрак.
Според официјалните информации од Хавана, дефектот повторно ја исфрли од колосек целата национална дистрибуција, принудувајќи ги властите итно да ги активираат сите расположливи дежурни служби за стабилизација на мрежата.
„Дојде до целосно исклучување на електроенергетскиот систем. Активирани се протоколи за враќање на снабдувањето со електрична енергија“, се наведува во објавата на Икс на кубанското Министерство за енергетика.
Дефектите во централите и американското ембарго го земаат данокот
Прекинот во снабдувањето со електрична енергија е предизвикан од дефект во термоцентрала, што предизвика исклучување на националната мрежа. Како што е веќе познато, Куба остана без електрична енергија на 6 и 10 јули.
Земјата веќе подолго време се наоѓа во исклучително тешка положба, каде што покрај застарената инфраструктура, главниот проблем лежи во недостигот на суровини за работа на електроцентралите.
„Куба е во сериозна енергетска криза поради дотраена инфраструктура и ембаргото за нафта воведено од САД пред неколку месеци.“
Ситуацијата дополнително се усложни по драматичните политички промени на почетокот на годинава, кои директно ги пресекоа каналите за набавка на енергенси во кои Куба традиционално се потпираше со децении.