Ерџан Демир е избран за нов министер без ресор на 112. седница на Собранието, посветена на реконструкцијата на Владата предводена од премиерот Христијан Мицкоски.
Демир доаѓа од редовите на владејачката ВМРО-ДПМНЕ, а на функцијата го наследува досегашниот министер без ресор Шабан Салиу, кој претходно беше разрешен.
Новиот министер во периодот од 2025 до 2026 година ја извршувал функцијата национален координатор за креирање и следење на национални стратегии и политики за немнозинските заедници во Владата.
Од 2021 до 2025 година бил член на Управниот одбор на ЈП „Комунална хигиена“ – Скопје, а претходно, од 2007 до 2021 година, работел како проектен менаџер во Здружението на граѓани за едукација и советување на млади „ФИЛЕО“ – Скопје.
Во својата професионална кариера бил и координатор за производство во „Фантази Мебел“ – Скопје, управител на компанијата за автопревоз „Шалом“ – Скопје, како и координатор за производство во „Архикон“ – Скопје.
Демир е дипломиран економист, со завршено високо образование на Економскиот факултет при Европскиот универзитет – Скопје.