Повеќе од 200.000 кондоми од Кина, лажно декларирани како играчки, ги заобиколија барањата за контрола на квалитетот на Европската Унија, изложувајќи ги потрошувачите на опасност и ризик од сексуално преносливи инфекции, несакани бремености и опасни хемикалии и материјали, објави „Евроњуз“ (Euronews).
Во ЕУ, кондомите се класифицирани како медицински помагала и мора да ги исполнуваат строгите здравствени и безбедносни стандарди, вклучувајќи контрола на микробиолошка контаминација, биокомпатибилност, отпорност на протекување, пропишани димензии, рок на траење и стабилност. Фалсификуваните производи од Кина ги заобиколиле сите овие услови, според Петр Клемент, раководител на Европската канцеларија за борба против измами (ОЛАФ).
„– Фалсификуваните кондоми се опасни. Тие се нетестирани, неисконтролирани и небезбедни,“ изјави Клемент.
Фалсификуваните кондоми, за коишто се проценува дека би чинеле вкупно повеќе од 200.000 евра, веќе се запленети во Романија, Србија и Шпанија. Според наводите на ОЛАФ, неисконтролираните производи биле продавани во Европа под името и логото на добро познат бренд, но канцеларијата засега не го открива точниот назив.
„Тешко е да се дадат точни бројки поради природата на нелегалните мрежи. Фалсификуваната стока е тешко да се пронајде, како што е тешко да се информираат поединците-потрошувачи кои можеби купиле такви кондоми“, соопшти ОЛАФ.
Во соработка со кинеските власти, ОЛАФ го идентификуваше извозникот зад спорните пратки, но во интерес на истрагата, и неговиот назив засега останува неисполнет во јавноста.