Министерот за одбрана Владо Мисајловски вчера во Анкара учествуваше на повеќе активности и состаноци во рамки на Самитот на НАТО, меѓу кои приемот за министрите за одбрана организиран од турскиот министер за национална одбрана Јашар Ѓулер, Индустрискиот форум и церемонијата за приклучување на Франција, Финска и Шведска кон иницијативата за НАТО обука за летање во Европа (NATO Flight Training Europe).
Од Министерството за одбрана информираат дека Мисајловски учествувал на Форумот за одбранбена индустрија, каде во фокус биле иновациите, развојот на одбранбената индустрија и можностите за заеднички набавки за опремување на вооружените сили.
На форумот, на кој присуствувале претставници од сојузничките и партнерските земји, како и претставници од воената индустрија, била испратена порака дека силната одбрана е поврзана со развојот на силна одбранбена индустрија. Од МО посочуваат дека учеството на овој настан е значајно и поради заложбите за поддршка на домашните компании од областа на наменската индустрија.
Во рамки на првиот ден од активностите, била одржана и церемонија за прием на Франција, Финска и Шведска во Мултинационалната соработка за воспоставување НАТО обука за летање во Европа (NFTE). Македонија е една од основачите на оваа иницијатива, која има цел да воспостави интегриран и стандардизиран систем за обука на пилоти, техничари и воздухопловен персонал според НАТО стандардите.
Мисајловски присуствувал и на приемот за министрите за одбрана организиран од турскиот министер Ѓулер, каде се обратил пред присутните и ја истакнал одличната билатерална соработка меѓу Северна Македонија и Турција.
Активностите продолжиле во претседателскиот комплекс во Анкара, каде министерот учествувал на состанокот на Северноатлантскиот совет во формат на министри за одбрана, заедно со министрите за одбрана на партнерските земји од Индо-пацифичкиот регион.
На состанокот Мисајловски ги претставил инвестициите во развојот и модернизацијата на Армијата, посочувајќи дека издвојувањата поврзани со одбраната и националната безбедност надминуваат 4 отсто од планираните 5 отсто кои треба да се достигнат во следните 10 години.
Тој нагласил дека со досегашните договори и поддршката од сојузниците и партнерите, вклучително и преку Европскиот мировен фонд, се зајакнуваат капацитетите на Армијата за учество во мировни мисии и операции.
Мисајловски посочил и дека продолжувањето на мисиите АЛТЕА на Европската Унија во Босна и Херцеговина и КФОР на НАТО во Косово е од особено значење за стабилноста и безбедноста на регионот.