Претседателот на Собранието Африм Гаши ја поддржува идејата за електронско гласање, доколку се обезбедат услови за сигурна идентификација на гласачите и заштита на тајноста на гласањето. Тој ги повика координаторите на пратеничките групи да работат на надминување на различните ставови и постигнување компромис околу Изборниот законик.
На брифинг со новинарите, Гаши истакна дека електронското гласање било дел и од програмата на неговата политичка партија „Алтернатива“.
Тој информираше дека на 13 јули е закажана седница за реконструкција на Владата, која ќе трае два дена, а новите членови ќе се гласаат поединечно.
На 15 јули е закажана нова собраниска седница на која ќе се поставуваат и опозициски прашања.
Општата расправа за ребалансот на Буџетот ќе трае до 8 јули, по што ќе започне разгледувањето на амандманите. Поднесени се 224 амандмани, а ребалансот треба да се најде на седница на 23 јули.
На 30 јули е закажана седница за пратенички прашања, која ќе биде последна пред летниот одмор на пратениците.
На Илинден, Гаши годинава ќе се обрати во Крушево.