Во Берово денеска ќе се одржи Регионален форум на Источниот плански регион посветен на одржливото управување со биоотпадот. Настанот го организира Здружението за еколошко одржлив развој „Зелен институт“, во партнерство со Националното здружение на сопственици на приватни шуми.
Форумот е дел од проектот „Нула биоотпад: Системски промени во партнерство со граѓаните“, кој се спроведува во рамки на програмата „Цивика мобилитас“, поддржана од Владата на Швајцарија.
Целта на проектот е да се поддржи транзицијата кон системи со „нула отпад“, преку подобрување на управувањето со биоотпадот, намалување на загадувањето и ризиците од пожари, како и унапредување на циркуларната економија и ефикасноста на јавните комунални претпријатија.
На отворањето поздравни обраќања ќе имаат градоначалникот на Берово Петар Ружински и Зорица Стрезоска од Секторот за Европска Унија при Министерството за животна средина и просторно планирање. Настанот ќе го модерира Лилјана Поповска, а презентации ќе одржат експертите Катарина Георгиевска и Аријан Тоска.
На форумот се поканети градоначалници, директори на јавни комунални претпријатија и претставници од сите 11 општини во Источниот плански регион, како и институции, стопански субјекти, земјоделски и шумски стопанства, стопански комори и медиуми.
Во рамки на настанот ќе биде презентирано истражување за управување со биоотпад, кое содржи анализи и предлози за технолошки, финансиски и институционални модели. По дискусиите со учесниците ќе се дефинираат најсоодветни решенија, кои ќе послужат како основа за изработка на пред-физибилити студија.
Организаторите посочуваат дека студијата ќе им помогне на општините во идентификување на можни извори на финансирање и модели за практична примена на системи за управување со биоотпад.
Анализата опфаќа количини и состав на биоотпад од домаќинства, индустрија, земјоделство и шумарство, како и можни технологии за негов третман преку децентрализирани и централизирани решенија, финансиски аспекти и институционални модели на соработка меѓу општините и приватниот сектор.