Во Владата денеска ќе биде потпишан договорот меѓу Јавното претпријатие за државни патишта (ЈПДП) и Европската банка за обнова и развој (ЕБОР) за грант-средства наменети за изградба на автопатот Скопје–Блаце. На настанот, кој ќе се одржи во 11 часот, ќе се обрати и премиерот Христијан Мицкоски.
Премиерот минатата недела соопшти дека е завршена постапката за избор на изведувач и дека со денешното потпишување на договорот ќе се создадат услови градежните работи да започнат уште во текот на овој месец.
Според него, станува збор за инфраструктурен проект што со години бил одложуван, а Владата има цел конечно да ја реализира оваа делница.
Вториот дел од автопатот, долг 10,5 километри, ќе го гради конзорциум предводен од домашната градежна компанија „Гранит“.
Вицепремиерот и министер за транспорт Александар Николоски претходно најави дека изградбата ќе започне летово и изрази очекување целиот проект да биде завршен за околу три и пол години. Според него, трасата ќе опфати пет тунели, две галерии, 12 мостови и десетици други придружни објекти.
Николоски оцени дека изборот на домашна компанија за изведувач претставува силен сигнал дека македонските градежни фирми имаат капацитет да реализираат големи инфраструктурни проекти.
Автопатот Скопје–Блаце ќе биде долг вкупно 12,5 километри. Од 2020 година се работи на првата делница, долга 2,5 километри, додека новиот договор се однесува на изградбата на преостанатиот дел од трасата.
Овој патен правец е дел од значаен регионален коридор што ја поврзува Македонија со Косово, а преку него и со Црна Гора и пристаништето Бар. Се очекува неговото завршување да го олесни патничкиот и товарниот сообраќај и да придонесе за подобро економско поврзување на регионот.